త్యాగమూ నేరమే!

దేహమొక కాంతిపేటిక

ప్రాతః సంధ్యలు సహజ మాతృవాత్సల్యాలతో
వాంచా సామీప్యాలను దూరం చేస్తాయి

ముంగిట తీర్చిన ముగ్గులు
స్వరాలను మెలికలు తిప్పుతూ
నిద్రిస్తుంటాయి

ప్రతి ఘడియా ప్రేమానుభవం కోరుతుంది
లోపల రక్తం సృజనగీతాన్ని రాస్తుంటుంది
నుదుట కుంకుమ
మెడ గంధం
అనుభవాల అర్ధాలను ప్రదర్శిస్తుంటాయి

ప్రేమ-ఒక తనివితీరని ఋణం
రుణగ్రస్తమైనదేదీ మనసును ఒదలదు

ఒక జ్ఞాపకపుతీరాన
తచ్చట్లాడుతూ అతడి ఉత్తరం

ప్రేమ-స్వలాభమే!
త్యాగమూ నేరమే!!